Liberalismo

A presente unidade didáctica é a duodécima das que constitúen o conxunto do programa docente da materia Institucións Políticas e Movementos Sociais Contemporáneos, materia obrigatoria (código G3031V01) do primeiro curso do Grao de Xornalismo da Universidade de Santiago de Compostela e xorde da necesidade de transmitir ao alumno a importancia do estudo das ideas e ideoloxías políticas contemporáneas na súa formación como futuro xornalista.

En primeiro lugar, transmitirase a necesidade de ter en conta a influencia do liberalismo político en tanto ideoloxía que pode cualificarse como a abandeirada das transformacións acontecidas no estado dende as sociedades do antigo ao novo réxime. En segundo lugar, tanto se concibimos a democracia como premisa ou como engadido posterior aos presupostos teóricos liberais, comprender que o liberalismo é un dos ingredientes que xunto ás ideas, valores e institucións da democracia estruturarían a contorna de gran parte das sociedades políticas contemporáneas occidentais e non occidentais. Neste senso, a presente unidade didáctica recolle de maneira sintética unha serie de contidos e conceptos centrais á hora de comezar a comprender e estudar en máis profundidade os trazos e complexidade de dito conxunto ideolóxico.