Termos esenciais de...

«Termos esenciais de...» é unha colección de glosarios bilingües (GL-ES) ou trilingües (GL-ES-EN), nacida en 2004 e sen periodicidade fixa, cuxos diferentes volumes buscan compilar a terminoloxía galega básica de diferentes áreas de coñecemento, cun grao de amplitude coincidente co ámbito de estudo dun departamento ou grupo de investigación, e cun nivel de profundidade semellante ao que se manexa durante os estudos de grao. A súa extensión adoita roldar os mil conceptos (aínda que poden non chegar a esta cantidade ou superala). Desde o primeiro volume (ano 2004) conviviron a edición en papel e a dixital en formato .pdf; pero desde o ano 2019 (Termos esenciais de logopedia e audioloxía) abandonouse o formato impreso e mantívose unicamente o dixital. As edicións en papel contaban con ISBN e estaban á venda por un período limitado; as versións dixitais edítanse con licenzas CC e en acceso aberto. Os distintos volumes que forman a colección diríxense principalmente ao alumnado da USC que cursa materias relacionadas coas áreas de especialidade que se tratan en cada un dos títulos. De feito, adóitase facer unha distribución gratuíta de exemplares impresos entre ese alumnado. As versións dixitais ofrécense de balde a través de internet.