Toponimia prelatina de Galicia

Esta monografía conságrase ao mundo lingüístico prelatino do noroeste da península Ibérica, moi particularmente no territorio da actual Galicia, a través dos nomes, entre os que os topónimos (no sentido máis amplo do termo) constitúen o grupo máis voluminoso e de documentación máis extensa ao longo da historia, dende as fontes antigas ata as modernas. A obra proporciona unha visión panorámica dos aspectos, problemas e polémicas máis relevantes, ilustrándoos cunha selección por natureza non exhaustiva, pero suficientemente representativa de exemplos. Para o autor, non cabe dúbida que na Galicia prelatina se falou unha lingua céltica e que todo o demais segue suxeito a especulacións. Insiste en que é fundamental recoller todo este material, moi especialmente das fontes medievais e modernas, onde permanece oculto un tesouro de extraordinario valor para tratar de reconstruír a protoforma latina de todos eses nomes.