As variedades intranacionais e internacionais do inglés

A presente unidade didáctica, dedicada ao estudo das variedades intranacionais e internacionais da lingua inglesa, forma parte da materia Variedades do Inglés (G5061345), materia opcional de 6 créditos (ECTS) do Maior Plus en Lingua e Literatura Inglesas. A materia impártese no segundo cuadrimestre do terceiro curso do Grao en Lingua e Literatura Inglesas (G5051V01). En particular, a UD aborda o derradeiro tema da materia, no que se introducen, en primeiro lugar, as variedades do inglés denominadas intranacionais, é dicir as faladas no Reino Unido e nos Estados Unidos de América (EUA). Por outro lado, dedícase tamén tempo ás variedades coñecidas como intranacionais, entre as que atopamos variedades que serven como estándares nacionais, como por exemplo o inglés australiano en Australia ou o inglés canadense en Canadá. Entre os ingleses internacionais tamén se clasifican outras variedades poscoloniais ou denominados «novos ingleses» (New Englishes), que xurdiron nas antigas colonias británicas —por exemplo, o inglés da India ou o inglés nixeriano— ou nos territorios que foron colonizados polos EUA, como é o caso do inglés filipino, así como algunhas linguas crioulas, como o Tok Pisin ou o Patois xamaicano, faladas en Papúa Nova Guinea e Xamaica respectivamente.