VII Encontro da Mocidade Investigadora: Santiago de Compostela, 27-29 de maio de 2019, libro de resumos

A sétima edición do Encontro Mocidade Investigadora, organizada polo Centro Internacional de Estudos de Doutoramento e Avanzados da Universidade de Santiago de Compostela (USC), tivo lugar os días 27, 28 e 29 de maio de 2019 na Facultade de Ciencias da Comunicación da USC. Contou coa participación de máis de 300 investigadores pertencentes aos distintos programas de doutoramento da Universidade de Santiago de Compostela. Tamén participaron doutorandos e doutorandas da Universidade de Vigo e da Universidade da Coruña.

Do mesmo xeito que nas pasadas edicións, estableceuse como obxectivo principal a visibilización do traballo dos participantes, en especial daqueles que se atopan en estadios iniciais da carreira investigadora. Así mesmo, tratouse de fomentar o intercambio de coñecementos entre as catro áreas temáticas principais (correspondentes ás catro Escolas de Doutoramento Internacionais: Artes e Humanidades, Ciencias Sociais e Xurídicas; Ciencias da Saúde; Ciencias e Tecnoloxía, e Campus Terra) mediante a organización de debates, conferencias e un xogo interactivo. O presente libro recolle os resumos dos traballos presentados no encontro, tanto orais como pósteres.