III Plan Estratéxico de Igualdade de Oportunidades entre Mulleres e Homes da USC

O III Plan Estratéxico de Igualdade de Oportunidades entre Mulleres e Homes da USC (PEIOMH) baséase na actualización do diagnóstico de igualdade da Universidade e nos resultados da avaliación do II PEIOMH, que fixeron visibles necesidades e desigualdades aínda presentes. O Plan nace dun amplo consenso participativo e do compromiso de inclusión dos colectivos da comunidade universitaria, de maneira que se teñan en conta as súas características e necesidades. Consonte estes criterios, o Plan abrangue seis áreas de actuación (Cultura institucional; Docencia, Investigación e transferencia; Presenza, promoción e representación;  Conciliación corresponsable; Acoso e violencia de xénero; Condicións sociosanitarias no traballo), nove obxectivos xerais, 21 específicos e 85 accións, cada unha das cales vai asociada a indicadores que permiten avaliar a súa implementación, servindo, ao tempo, de guía para adoptar decisións que melloren o seu desenvolvemento. Ademais, contémplanse as unidades responsables da execución das distintas accións, implicando a toda a institución nun exercicio de corresponsabilidade na execución.