Estudo dunha enfermidade neurodexenerativa: un proxecto para Formación Profesional

A Formación Profesional é un ciclo educativo estreitamente vinculado co mundo laboral, polo que as propostas didácticas neste eido deben procurar capacitar o alumnado no desenvolvemento das destrezas requiridas no ámbito profesional, agardándose, no caso concreto dos ámbitos científico e sanitario, que o alumando sexa quen de desenvolver investigacións con autonomía e capacidade crítica. A presente monografía, nesta liña, desenvolve un proxecto de investigación fundamentado na estratexia didáctica da aprendizaxe baseada en proxectos (ABP), que outorga autonomía ao alumnado para tomar decisións na investigación dunha enfermidade neurodexenerativa, a enfermidade de Niemann-Pick. Isto favorecerá o desenvolvemento da competencia científica e do pensamento crítico, forzando ao estudo das bases desa patoloxía nun organismo modelo, o peixe cebra, e á determinación dun posible tratamento para os seus síntomas.