Besnoitiose bovina

A besnoitiose bovina é unha enfermidade parasitaria causada polo protozoo Besnoitia besnoiti. Trátase dunha enfermidade emerxente en Europa con distribución mundial. O ciclo de vida do parasito é indirecto e os bovinos actúan como hospedeiros intermediarios, non se coñece o hospedeiro definitivo e os dípteros hematófagos actúan como vectores mecánicos. A enfermidade normalmente presenta tres fases, unha fase aguda, na que os animais presentan signos clínicos inespecíficos, seguida dunha fase asintomática e unha fase final crónica, na que os animais presentan quistes na derme, tecido subcutáneo e mucosas. Cabe sinalar que moitos animais non mostran signos clínicos evidentes, pasando a infección desapercibida ou confundíndose con outras afeccións.