ANOVA: o modelo de análise da varianza

O modelo de análise da varianza ou modelo ANOVA, do inglés ANalysis Of VAriance, é unha metodoloxía estatística que se enmarca dentro dos modelos de regresión. Os modelos de regresión permiten establecer a relación de dependencia entre unha variable de interese, que denotaremos por Y (chamada variable resposta), con respecto a outra(s) variable(s), que denotaremos por X (chamada(s) variable(s) explicativa(s) ou covariable(s)). O modelo ANOVA permite comparar a media da variable resposta Y (variable cuantitativa continua), entre os distintos grupos ou categorías dunha variable explicativa X (variable cualitativa ou cuantitativa discreta), é dicir, imos determinar se a variable X presenta ou non un efecto significativo sobre a media da variable Y.