A formación, a orientación e o emprego, determinantes na vulnerabilidade social: actas do XV Congreso Internacional de Galicia e Norte de Portugal de Formación para o Traballo, Ourense, 26, 27 e 28 de setembro de 2013

A exclusión e as desigualdades aumentan cando os recursos escasean. A distribución da riqueza material e inmaterial corren o risco de sufrir novos desequilibrios nun retroceso inxusto do que se tiña acadado na orde mundial soñada polos pobos. A vulnerabilidade social está intimamente relacionada co concepto de desamparo, carencia, desatención e, por ende, pobreza. Neste contexto de incertidume social, tivo lugar a celebración do XV Congreso Internacional de Galicia e Norte de Portugal de Formación para o Traballo, en Ourense os días 26, 27 e 28 de setembro de 2013, baixo o lema «A formación, a orientación e o emprego, determinantes na vulnerabilidade social. Cidadanía, poboación activa e sociedade inclusiva: impacto da crise no patrimonio inmaterial das persoas». Nesta XV edición o obxectivo foi relacionar a orientación profesional, a educación superior, a formación profesional, a formación para o emprego, a sociedade e a comunidade coa vulnerabilidade das persoas. Repasar e afondar nos saberes teóricos e prácticos destes ámbitos do coñecemento e revalidar o seu potencial nun momento como o actual de crise económica, social, cultural e persoal.