Goberno e Administración

A presente Unidade Didáctica, denominada «Goberno e administración», forma parte da materia «Cultura e Poder na Idade Moderna» que se imparte como optativa no segundo semestre do Grao en Historia da Universidade de Santiago de Compostela. Como o seu propio título indica, a materia subdivídese en dous grandes bloques: o mundo cultural e o poder. No primeiro deles, o obxecto de análise é a dobre natureza do mundo cultural en canto ós seus protagonistas: cultura popular e cultura elitista. Posteriormente a materia propón unha análise dos medios polos cales se difunden e se expresan eses contidos culturais. Por último, os comportamentos relixiosos serán estudados en particular como un dos fenómenos máis representativos do panorama cultural. No segundo dos bloques, o poder e o goberno serán os protagonistas temáticos, reflexionando sobre o exercicio da administración, a socioloxía dos seus profesionais e, finalmente, as claves para entender as relacións internacionais na época moderna.