A organización administrativa do territorio

A presente unidade didáctica forma parte da materia Xeografía de Galicia, que se imparte de xeito obrigatorio no terceiro curso do grao en Xeografía e Ordenación do Territorio. A organización do territorio constitúe un asunto relevante no estudo de calquera xeografía rexional. En efecto, estabelecer e discutir os límites das rexións xeográficas que se determinan a calquera escala, así como das entidades político-administrativas que se asocian —ou non— a esas delimitacións, é un tema chave no estudo xeográfico. Esta unidade didáctica ofrece as chaves para interpretar os marcos político-administrativos de Galicia —provincias, comarcas, concellos e parroquias—, tanto no seu proceso de configuración ao longo do tempo como na súa influencia actual.