As orixes de Galicia: entre a prehistoria e a historia

As etapas finais do período prehistórico adoitan definirse baixo o termo protohistoria, que fai referencia aos tempos de transición entre a Prehistoria e os comezos da Historia, marcada pola introdución da escritura. O final da Prehistoria en Galicia, ou entón, a Protohistoria de Galicia, vén determinada pola Idade do Ferro e, especificamente, pola cultura castrexa; período situado no primeiro milenio a. C. (entre o 900/800 a.C. e a chegada de Roma). A cultura castrexa toma nome da súa principal manifestación arqueolóxica, ben coñecida por todos: os castros.